Lykilmenn í meistaraflokki karla í handbolta hafa endurnýjað samninga sína við félagið

Síðustu vikur hafa lykilmenn í meistaraflokki karla í handbolta endurnýjað samninga sína við félagið. 

Leikmennirnir sem um ræðir eru þeir Aron Heiðar Guðmundsson, Aron Valur Jóhannsson, Styrmir Sigurðarson og Viktor Jóhannsson. 
En allir þessir leikmenn hafa spilað um og yfir 100 leiki fyrir Þrótt, það er því gríðarlega mikill fengur fyrir Þrótt að halda þessum leikmönnum. 

Aron Heiðar miðjumaður og Styrmir skytta eru uppaldir hjá Þrótti og báðir verið fyrirliðar liðsins á síðustu árum og hafa því verið ansi mikilvægir í leik liðsins.
Viktor sem lengst af hefur spilað í vinstra horni gekk til liðs við með Þrótt tímabilið 2014/15 Aron Valur sem er línumaður gekk til liðs við Þrótt tímabilið 2016/17 og hefur verið gríðarlega mikilvægur liðinu bæði í vörn og sókn.

Ný stjórn í handboltanum

Undanfarnar vikur hefur aðalstjórn félagsins unnið að endurskipulagningu á handknattleiksdeildinni og nú hefur stjórn handknattleiksdeildar verið mynduð fram að næsta aðalfundi deildarinnar. 

Stjórnina  skipa þau Vala Valtýsdóttir (formaður), Gísli Óskarsson og Guðmundur Óskarsson og verður þeirra verkefni á næstunni að vinna að stefnumótun handboltans í samráði við nýráðinn yfirþjálfara, Óskar Jón Guðmundsson.  Jafnframt mun stjórn deildarinnar vinna að því að fá til liðs við sig aðila sem geta komið að yngri flokka starfi félagsins í handboltanum.  Við bjóðum þau velkomin til starfa og óskum þeim farsældar í verkefnunum sem framundan eru.  Lifi….!

Óskar Jón ráðinn sem yfirþjálfari handboltans hjá Þrótti

Óskar Jón Guðmundsson hefur verið ráðinn sem yfirþjálfari handboltans hjá Þrótti en því felst m.a. að hann verður aðalþjálfari meistaraflokks auk þess að þjálfa í yngri flokkum félagsins.  Í starfinu felst jafnframt ákveðið utanumhald handboltans hjá félaginu, vinna við stefnumótun til næstu ára, skipulagningu æfinga, nýliðun og yfirumsjón með öllu yngri flokka starfinu.  Ráðning Óskars er hluti af endurskipulagningu á handknattleiksdeildinni sem aðalstjórn hefur haft frumkvæði að undanfarið.

Óskar Jón er 33 ára gamall og er Þrótturum kunnugur þar sem hann hefur áður þjálfað í allnokkur ár hjá félaginu og síðast veturinn 2014-2015 þegar hann var þjálfari meistaraflokks karla.  Hann hefur á síðustu misserum verið þjálfari og framkvæmdastjóri handknattleiksdeildar Harðar á Ísafirði en snýr nú aftur til Þróttar og tekur við mikilvægu uppbyggingastarfi í félaginu.  Við bjóðum Óskar velkominn til baka í Hjartað í Reykjavík og eigum von á góðu og farsælu samstarfi.  Lifi…!