Nik Chamberlain nýr aðalþjálfari meistaraflokks kvenna í Þrótti

Þróttur samdi á dögunum við Nik Chamberlain um að taka að sér starf aðalþjálfara meistaraflokks og 3. flokks kvenna í knattspyrnu, en aðalþjálfari liðsins, Ásmundur Vilhelmsson, lét af störfum fyrir nokkrum vikum. Aðstoðarþjálfari meistaraflokks kvenna sem fyrr er Rakel Logadóttir, en hún hefur gegnt því starfi frá því síðastliðinn vetur.

Nýja þjálfarateymið fer vel af stað og er nú þegar komið með 9 stig af 9 mögulegum í fyrstu þremur leikjum sínum. Sigur náðist gegn Hvíta riddaranum í þeirra fyrsta leik saman, 6-2 á heimavelli. Í kjölfarið komu tveir 2-0 sigrar á útivelli, gegn KH og Skínandi. Þróttur er nú í 4. sæti í A-riðli 1. deildar. Þess má geta að Þróttur spilar í kvöld við Fram á heimavelli sínum í Laugardal, kl. 20:00.

VIRKILEGA SPENNTUR OG ÞAKKLÁTUR
„Ég er virkilega spenntur og þakklátur fyrir að hafa fengið þetta tækifæri hjá Þrótti. Við höfum farið vel af stað saman, en eigum þó langt í land með að ná þeim markmiðum sem við höfum í sameiningu sett okkur. Ég finn að stelpurnar eru hungraðar í árangur, enda er komin smávegis hefð fyrir því hérna í Laugardal að eiga lið í fremstu röð,“ segir Nik Chamberlain, nýráðinn þjálfara meistarflokks kvenna í knattspyrnu.

„Lengd samningsins er yfir fjögur tímabil og færir þess vegna ákveðna ró yfir hópinn og starfið þar. Nú getum við skoðað markmið til langtíma í samhengi við þróun yngri flokka upp á efsta stig meistaraflokks. Yngri stelpurnar þurfa að hafa vissu um að sama heimspeki í þjálfun renni gegnum alla flokka og að grundvallaratriðin, leikstíllinn og nálgunin breytist lítið milli ára. Það er höfuðatriði til að ná stöðugum árangri og byggja starfið upp til langtíma,“ bætir Nik við.

NOKKUR ORÐ UM ÞJÁLFARATEYMIÐ
Englendingurinn Nik Chamberlain hefur spilað með fjölmörgum liðum í neðri deildum Íslandsmótsins undanfarinn áratug, einkum á Austurlandi og Norðurlandi. Hann hefur samhliða þessu fengist talsvert við þjálfun og náð þar góðum árangri. Samningur Niks við Þrótt er til þriggja og hálfs árs eða út þetta keppnistímabil og yfir næstu þrjú.

Rakel á að baki langan og farsælan feril sem leikmaður og landsliðskona og er meðal annars margfaldur Íslandsmeistari. Hún kom til starfa hjá Þrótti síðastliðinn vetur sem þjálfari 2. flokks og aðstoðarþjálfari meistaraflokks kvenna.

Stefán Hrafn Hagalín